Bydd y newid yn yr hinsawdd yn golygu mwy o ddigwyddiadau o lawiad eithafol, ond bydd yn golygu hafau mwy cynnes a sych hefyd. Yn ogystal, mae'r galw am ddŵr yn newid oherwydd twf y boblogaeth, newidiadau mewn defnydd tir, ymddygiad cwsmeriaid a strwythur yr economi, fel y cynnydd mewn twristiaeth er enghraifft.

Mae'r bwlch rhwng y cyflenwad a'r galw yn cynyddu o hyd. Er mwyn helpu i daclo â hyn, byddwn n'n defnyddio ein cynllun rheoli adnoddau dŵr i sicrhau cydbwysedd cynaliadwy a fforddiadwy rhwng y cyflenwadau sydd ar gael a'r galw sydd amdanynt. Rydyn ni'n cynnig rhoi trosglwyddiadau dŵr, mesurau rheoli dŵr a rhaglenni lleihau gollyngiadau ar waith er mwyn mynd i'r afael ag unrhyw ddiffygion.

Rydyn ni'n gwybod bod taclo’r newid yn yr hinsawdd yn bwysig i'n cwsmeriaid. Byddwn ni'n parhau i ofyn iddynt chwarae eu rhan trwy ddefnyddio'r dŵr sydd ei angen arnynt gan ofalu i beidio â'i wastraffu. Yn ogystal â sicrhau bod digon o ddŵr gennym i ddiwallu anghenion ein cwsmeriaid, bydd hyn yn lleihau faint o ynni rydyn ni'n ei ddefnyddio wrth drin a phwmpio'r dŵr hefyd. Dyna pam ein bod am fanteisio i'r eithaf ar gyfleoedd i ailddefnyddio dŵr wedi ei drin a deunyddiau naturiol eraill a allai fod yn werthfawr, gan gyfrannu at yr economi cylchol yn ein rhanbarth lleol.

Yn rhan o'r broses o edrych ar y galw am ddŵr, rydyn ni wedi datblygu rhagolygon o'r galw yn ein parthau, gan amcangyfrif lefelau defnydd mewn blwyddyn poeth a sych, ac ar gyfer y cyfnod defnydd brig critigol. Mae hyn yn rhoi dealltwriaeth i ni o ran a allwn gyflenwi dŵr i'n holl gwsmeriaid yn gyson o dan yr amodau caletaf, gydag un llygad ar y risgiau a'r ansicrwydd sydd ynghlwm wrth baratoi rhagolygon tymor hir.

Byddwn ni'n edrych ar y canlynol er mwyn helpu gyda'r diffyg rhwng cyflenwadau a galw:

• Rheoli'r galw – arbed dŵr trwy gynorthwyo cwsmeriaid i leihau eu defnydd;
• Ailddefnyddio dŵr – annog pobl i ailddefnyddio dŵr llwyd a chynaeafu dŵr glaw;
• Mesuryddion dŵr – i gymell pobl i ddefnyddio llai o ddŵr;
• Gollyngiadau – lleihau faint o ddŵr sy'n cael ei golli o fewn ein system trwy gynyddu ein buddsoddiad mewn monitro a thrwsio gollyngiadau, gan gynnwys y tu hwnt i ffiniau domestig;
• Trosglwyddo a chyfnewid dŵr – ar draws parthau cwsmeriaid, nodau llesiant neu ffiniau cwmnïau, gan gydnabod y risgiau amgylcheddol cysylltiedig, fel ymlediad rhywogaethau anfrodorol;
• Rheoli dalgylchoedd a chadw dŵr trwy ddulliau naturiol – ar dir uchel, mewn gwlyptiroedd ac ar orlifdiroedd; ac
• Optimeiddio adnoddau dŵr – gan ddefnyddio ffynhonnell newydd o ddŵr neu gynyddu faint o ddŵr rydyn ni'n ei godi o ffynhonnell gyfredol.