Rheoliadau Gwybodaeth Amgylcheddol

Ers Chwefror 2015, mae Rheoliadau Gwybodaeth Amgylcheddol 2004 (EIR) yn berthnasol i gwmnïau dŵr a charthffosiaeth, gan gynnwys Dŵr Cymru, ac maent yn eich galluogi i ofyn am wybodaeth am ein penderfyniadau a'n gwaith sy'n ymwneud â'r amgylchedd neu'n effeithio arno.

Dylid nodi nad yw gofynion y Ddeddf Rhyddid Gwybodaeth 2000 yn berthnasol i Dŵr Cymru.

Beth sy'n cyfrif fel “gwybodaeth amgylcheddol?

Yn ôl y Rheoliadau Gwybodaeth Amgylcheddol, gwybodaeth amgylcheddol yw unrhyw wybodaeth ysgrifenedig, weledol, glywedol, electronig neu ar unrhyw ffurf faterol arall am y pethau canlynol:

a) Cyflwr elfennau'r amgylchedd, fel yr aer a'r atmosffer, dŵr, pridd, tir, y dirwedd a safleoedd naturiol gan gynnwys ardaloedd gwlyptir, arfordirol a morol, amrywiaeth biolegol a'i chydrannau, gan gynnwys organebau sydd wedi eu haddasu'n enetig, a'r rhyngweithio rhwng yr elfennau hyn;

b) Ffactorau, fel sylweddau, ynni, sŵn, ymbelydredd neu wastraff, gan gynnwys gwastraff ymbelydrol, allyriannau, rhedlifoedd a gollyngiadau eraill i'r amgylchedd, sy'n effeithio ar yr elfennau o'r amgylchedd y cyfeirir atynt yn (a) neu sy'n debygol o wneud hynny;

c) Mesurau (gan gynnwys mesurau gweinyddol), fel polisïau, deddfwriaeth, cynlluniau, rhaglenni, cytundebau amgylcheddol a gweithgareddau sy'n effeithio ar yr elfennau a'r ffactorau y cyfeirir atynt yn (a) a (b) neu sy'n debygol o wneud hynny, yn ogystal â mesurau neu weithgareddau y bwriedir iddynt amddiffyn yr elfennau hynny;

d) Adroddiadau ar weithredu deddfwriaeth amgylcheddol;

e) Manteision o ran costau a dadansoddiadau economaidd a rhagdybiaethau eraill a ddefnyddir o fewn fframwaith y mesurau a'r gweithgareddau y cyfeirir atynt yn (c);

f) Cyflwr iechyd a diogelwch pobl, gan gynnwys halogi'r gadwyn fwyd, lle bo hynny'n berthnasol, amodau byw pobl, safleoedd diwylliannol a strwythurau adeiledig, a hynny i'r fath raddau y mae cyflwr yr elfennau o'r amgylchedd y cyfeirir atynt yn (a) yn effeithio arnynt neu y gallent effeithio arnynt, neu unrhyw faterion y cyfeirir atynt yn (b) a (c) trwy'r elfennau hynny.

Pryd i beidio â gwneud cais

Os hoffech gael gafael ar wybodaeth sydd gennym amdanoch chi, gwnewch gais gwrthrych data yn lle hynny. Gweler yma.

Gwneud cais

Os hoffech ofyn am wybodaeth amgylcheddol gennym ni, nodwch y wybodaeth ganlynol:

• Pa wybodaeth yr hoffech i ni ei darparu
• Y fformat yr hoffech gael y wybodaeth ynddi
• Eich manylion cyswllt

Gallwch gyflwyno eich cais drwy:

• anfon e-bost i EnvironmentalInformationRequests@dwrcymru.com; neu
• ysgrifennu atom yn Ceisiadau Gwybodaeth Amgylcheddol, Dŵr Cymru Welsh Water, PO BOX 690, Linea, Fortran Road, Caerdydd, CF3 5WL

Byddwn fel arfer yn ymateb i'ch cais o fewn 20 diwrnod gwaith. Efallai y byddwn yn ymestyn yr amserlen hon i 20 diwrnod gwaith pellach os yw'r wybodaeth y gofynnwyd amdani yn arbennig o gymhleth neu'n swmpus. Byddwn yn rhoi gwybod i chi os yw hyn yn wir.

Eithriadau

Efallai na fyddwn yn gallu darparu'r wybodaeth y gofynnir amdani os nad ydym yn cadw'r wybodaeth, neu os oes eithriad yn berthnasol. Os penderfynwn fod eithriad yn berthnasol, byddwn yn dweud wrthych pam. Pan fo'n berthnasol, byddwn yn esbonio rhesymau budd y cyhoedd dros gadw'r wybodaeth yn ôl. Gallwch apelio yn erbyn y penderfyniad hwn a byddwn yn cynnwys manylion am sut i wneud hyn yn ein hymateb.

Mae gan wefan yr ICO fwy o wybodaeth am wrthod ceisiadau.

Taliadau

Mae gennym y disgresiwn i godi ffi resymol am ddarparu gwybodaeth amgylcheddol. Rydym yn cadw'r hawl i godi tâl na fydd yn fwy na'r costau y byddwn yn eu hysgwyddo wrth ddarparu'r wybodaeth.

Os nad ydych yn fodlon â'n hymateb ni

Gallwch ofyn am adolygiad mewnol os nad ydych yn credu ein bod wedi cydymffurfio â'n rhwymedigaethau o dan y Rheoliadau Gwybodaeth Amgylcheddol.

Dylid cyflwyno ceisiadau am adolygiad mewnol o fewn 40 diwrnod gwaith ar ôl dyddiad derbyn ein hymateb i'ch cais am wybodaeth a dylid eu cyfeirio at Ysgrifennydd y Cwmni, Linea, Fortran Road, Llaneirwg, Caerdydd CF3 0LT.

Os nad ydych yn fodlon â chanlyniad ein hadolygiad mewnol, gallwch gwyno i'r Comisiynydd Gwybodaeth.

Gwybodaeth bellach

Am ragor o wybodaeth am y Rheoliadau Gwybodaeth Amgylcheddol ewch i yma.