Cyfle olaf i gymryd rhan yng nghynigion cynnar Dŵr Cymru ar gyfer gweithfeydd trin dŵr Merthyr

Mae ymgynghoriad Dŵr Cymru ar ei gynigion ar gyfer gweithfeydd trin dŵr newydd ym Merthyr Tudful yn dod i ben ddydd Llun 9 Medi.

Ar hyn o bryd mae’r cwmni dŵr nid-er-elw yn cynnal ymgynghoriad cyhoeddus ar ei gynigion diwygiedig i fuddsoddi mewn gweithfeydd trin dŵr newydd a chydnerth – gan ddiogelu’r cyflenwad dŵr yfed yn y dyfodol i genedlaethau’r presennol a’r dyfodol.

Mae’r cwmni’n galw ar y cyhoedd i ymateb ac i roi eu barn ar y cynnig i uwchraddio Gwaith Trin Dŵr Llwyn-onn a datblygu gwaith trin dŵr newydd yn Fferm Dan-y-Castell, wrth ymyl Ystad Ddiwydiannol Pant. Maent yn croesawu adborth gan gynifer o bobl â phosibl i helpu i lunio’r cynigion ymhellach, cyn cam nesaf yr ymgynghoriad.

Gan fod Dŵr Cymru yn awyddus i gydweithio â’r gymuned leol, mae cyfle hefyd i anfon eich syniadau ar gyfer prosiectau y gall eu cefnogi gan gynnwys mentrau sydd o fudd yn lleol i’r amgylchedd a bioamrywiaeth.

Mae angen y buddsoddiad gan fod tri gwaith trin dŵr yn yr ardal, Pontsticill, Cantref a Llwyn-onn, yn heneiddio ac yn agosáu at ddiwedd eu hoes weithredol. Mae dyletswydd gyfreithiol newydd wedi’i gosod ar Dŵr Cymru gan yr Arolygiaeth Dŵr Yfed i adeiladu gwaith trin dŵr newydd.

Mae’r cynigion diwygiedig wedi dod yn sgil adolygiad 2 flynedd gan y cwmni i ddatblygu datrysiad arall i’r cynnig gwreiddiol y gwnaethant ymgynghori arno gyda’r gymuned leol yn 2022.

Roedd yr adborth a gafwyd, yn 2022, o gymorth wrth lunio’r cynigion newydd, ac nid yw cynnig blaenorol Fferm y Gurnos yn cael ei ystyried erbyn hyn, ac nid oes angen pibellau newydd – na’r tarfu cysylltiedig mwyach ym Mharc Cyfarthfa, Georgetown a’r Gurnos.

Dywedodd Ian Christie, Rheolwr Gyfarwyddwr Dŵr, Cynllunio Asedau a Chyflenwi Cyfalaf Dŵr Cymru:

"Roeddem yn gwerthfawrogi’n fawr yr adborth a gawsom yn dilyn ein hymgynghoriad yn 2022, rydyn ni nawr yn falch o rannu’r cynnydd yr ydym wedi’i wneud a gofyn am farn y gymuned leol, sy’n werthfawr iawn, a fydd yn ein helpu ni i lunio’n cynigion ymhellach cyn iddyn nhw gael eu cwblhau.

Mae’r prosiect hwn yn hanfodol er mwyn i ni barhau i ddarparu cyflenwad diogel a dibynadwy o ddŵr yfed i’n cwsmeriaid yn yr ardal am bris fforddiadwy. Rydyn ni eisiau gweithio mewn partneriaeth â’r gymuned a rhanddeiliaid, nid yn unig i fuddsoddi yn y rhwydwaith dŵr, ond hefyd yn y gymuned leol.

Rydyn ni’n annog eich cydweithrediad a’ch adborth ac rydyn ni’n edrych ymlaen at glywed eich syniadau."

Y cam nesaf fydd ymgynghoriad statudol, a’r disgwyl ar hyn o bryd yw y bydd yn ddechrau yn gynnar yn 2025, lle bydd y gymuned leol unwaith eto’n cael cyfle i ddweud eu dweud ar y cynlluniau manylach cyn i Dŵr Cymru gyflwyno ceisiadau cynllunio.
Mae Dŵr Cymru wedi datblygu ystafelloedd ymgynghori rhithwir gyda’r holl wybodaeth ddiweddaraf yn ymwneud â’r cynigion y mae modd eu gweld yma 

Gallwch lenwi ffurflenni adborth ar-lein drwy’r ystafelloedd ymgynghori rhithwir neu ofyn am gopi. Mae angen dychwelyd pob sylw i Dŵr Cymru erbyn dydd Llun 9 Medi 2024.