Mae ein gweithfeydd trin dŵr yn ardal Parc Cenedlaethol Bannau Brycheiniog yn darparu dŵr yfed i bobl ar draws Merthyr Tudful a’r cyffiniau. Enw’r prosiect buddsoddi yn yr ardal hon yw Strategaeth Cyflenwad Dŵr Cwm Taf, sy’n diogelu ein cyflenwad dŵr i’n cwsmeriaid at y dyfodol.
Mae ein rhwydwaith dŵr yfed yn yr ardal hon yn cynnwys nifer o weithfeydd trin dŵr, yr adeiladwyd llawer ohonynt ar ddechrau’r 1900au.
Mae'r gweithfeydd trin dŵr ym Mhontsticill, Cantref a Llwyn-onn yn heneiddio ac wedi dod yn gynyddol anodd eu cynnal. Erbyn hyn, mae dyletswydd gyfreithiol arnom i adnewyddu'r prosesau trin dŵr, gan ddarparu ateb cynaliadwy i gyflenwi dŵr yfed glân ymhell i'r dyfodol.
Heb fuddsoddiad mawr, ni fyddwn yn gallu parhau i gyrraedd y safonau dŵr yfed uchel y mae'n rhaid i ni gydymffurfio â nhw, a bydd cwsmeriaid mewn perygl o fwy o doriadau i’r cyflenwad dŵr yn y dyfodol.
Rydym wedi treulio amser yn ystyried yr opsiynau sydd ar gael i ni, gan ymgynghori hefyd â'r gymuned leol a rhanddeiliaid ar ein cynigion, er mwyn helpu i lywio ein penderfyniadau.
Ein hymgynghoriadau
Cynnig gwreiddiol: Gwaith Trin Dŵr ar Un Safle 2022
Yn 2022, cynhaliwyd ymgynghoriad anstatudol ar gynigion cynnar i ddisodli'r tri safle gwaith trin dŵr presennol gyda gwaith trin dŵr newydd ar un safle ar Fferm Gurnos, Merthyr Tudful, a gwahoddwyd y gymuned leol a rhanddeiliaid i wneud sylwadau ar y cynnig hwn.
Roedd yr adborth a gawsom yn hynod ddefnyddiol. Yn dilyn ymgynghoriad 2022, gwnaethom dreulio amser yn gwrando ar adborth y gymuned leol ac yn herio ein hunain i weld a oedd atebion eraill a oedd yn cydbwyso ein hangen i gyflawni ein dyletswydd gyfreithiol i wella'r seilwaith dŵr lleol gan ystyried adborth y gymuned ac effeithiau amgylcheddol hefyd.
Cynigion diwygiedig: Dull ar draws dau safle 2024
Drwy gymryd amser ychwanegol i adolygu a chynnal arolygon pellach, roeddem yn gallu diwygio ein cynigion gan gynnig dull ar draws dau safle, sy'n golygu cynnig uwchraddio Gwaith Trin Dŵr presennol Llwyn-onn ac adeiladu gwaith trin dŵr newydd llai o faint yn Fferm Dan-y-Castell, Merthyr Tudful, ynghyd â gorsaf bwmpio dŵr crai newydd yn ein safle Gwaith Trin Dŵr presennol ym Mhonsticill.
Mae’r dull ar draws dau safle yn ein galluogi:
- I uwchraddio un o'r gweithfeydd trin dŵr presennol ac ailddefnyddio asedau presennol Dŵr Cymru.
- I leihau maint gwaith trin dŵr newydd sydd ei angen yn ardal Merthyr Tudful.
- I leihau faint o bibellau a gorsafoedd pwmpio newydd sydd eu hangen, gan ddiogelu treftadaeth ac amharu ar draffig cyn lleied â phosibl.
- I leihau costau cyfalaf a'r gost i'n cwsmeriaid.
- I ddarparu ateb carbon ymgorfforedig is drwy fanteisio i’r eithaf ar y seilwaith presennol.
Yn 2024, cynhaliwyd ymgynghoriad anstatudol pellach ar y cynigion diwygiedig hyn, a fydd gyda'i gilydd yn darparu cyfleusterau trin dŵr newydd a chydnerth, gan ddiogelu a pharatoi'r cyflenwad dŵr at y dyfodol i genedlaethau'r presennol a'r dyfodol, gan ddileu'r angen am waith trin mwy o faint ar un safle ar Fferm Gurnos.
Ceir rhagor o wybodaeth am y cynigion hyn yn nogfen Ymgynghoriad Anstatudol Strategaeth Cyflenwad Dŵr Cwm Taf 2024, sydd ar gael yn yr adran dogfennau isod.
Hoffem ddiolch i bawb a roddodd o’u hamser i ymgysylltu â'r broses ymgynghori anstatudol. Mae'r adborth a gafwyd wedi'i werthfawrogi'n fawr.
Beth sy’n digwydd nawr
Rydym wedi bod yn parhau i gynnal arolygon pellach, yn ogystal ag adolygu'r adborth a gafwyd, sydd wedi ein helpu i lunio a datblygu'r cynigion y gwnaethom ymgynghori arnynt yn 2024, y dull ar draws dau safle.
Mae'r dull ar draws dau safle yn rhoi ateb cydnerth i ni sy'n cydbwyso'r adborth a gafwyd a'r effeithiau amgylcheddol. Felly, rydym wedi bod yn bwrw ymlaen â'r dyluniadau ar gyfer y cynigion canlynol:
- Gwaith Trin Dŵr Dan-y-Castell a Gorsaf Bwmpio Pontsticill
- Uwchraddio Gwaith Trin Dŵr Llwyn-onn.
Beth nesaf
Er mwyn i ni gyflawni ein dyletswydd gyfreithiol a symud ymlaen â'n cynigion i fuddsoddi yn ein cyfleusterau trin dŵr, bydd angen i ni geisio caniatâd cynllunio.
Cyn i ni gyflwyno ein ceisiadau cynllunio bydd angen i ni gynnal ymgynghoriadau pellach, lle byddwn yn cyflwyno fersiynau drafft o ddogfennau ein ceisiadau cynllunio, gan roi cyfle i'r gymuned leol a rhanddeiliaid adolygu a rhoi sylwadau ar ein cynigion. Enw’r broses hon yw ymgynghoriad cyn ymgeisio.
Mae'r ateb ar draws dau safle yn golygu y bydd angen i ni ymgynghori ar bob cais ar wahân cyn cyflwyno ceisiadau cynllunio ar wahân ar gyfer pob cynnig i'r ddau awdurdod cynllunio perthnasol, sef Cyngor Bwrdeistref Sirol Merthyr Tudful ac Awdurdod Parc Cenedlaethol Bannau Brycheiniog.
Rydym wrthi’n paratoi’r wybodaeth ar gyfer yr ymgynghoriad cyn-ymgeisio, ac rydym yn anelu at gynnal yr ymgynghoriadau hyn yn Hydref 2025.
Gwybodaeth bellach
Unwaith y byddwn wedi cadarnhau'r dyddiadau ar gyfer yr ymgynghoriad cyn ymgeisio, byddwn yn hysbysu'r gymuned leol a rhanddeiliaid, a byddwn yn croesawu eich adborth unwaith eto.
Rydym yn deall y bydd llawer o gwestiynau am y prosiect hwn a pham mae angen i ni ei wneud. Os oes gennych unrhyw ymholiadau, anfonwch neges e-bost atom cwmtafproject@dwrcymru.com.
