Mae ein gweithfeydd trin dŵr yn ardal Parc Cenedlaethol Bannau Brycheiniog yn darparu dŵr yfed i bobl ar draws Merthyr Tudful a’r cyffiniau. Enw’r prosiect buddsoddi yn yr ardal hon yw Strategaeth Cyflenwad Dŵr Cwm Taf - sy’n diogelu ein cyflenwad dŵr i’n cwsmeriaid at y dyfodol.
Mae ein rhwydwaith dŵr yfed yn yr ardal hon yn cynnwys nifer o weithfeydd trin dŵr, llawer ohonynt wedi’u hadeiladu ar ddechrau’r 1900au.
Mae'r gweithfeydd trin dŵr ym Mhontsticill, Cantref a Llwyn-onn yn heneiddio ac wedi dod yn fwyfwy anodd eu cynnal. Erbyn hyn, mae dyletswydd gyfreithiol arnom i adnewyddu'r prosesau trin dŵr, gan ddarparu ateb cynaliadwy i gyflenwi dŵr yfed glân ymhell i'r dyfodol.
Heb fuddsoddiad mawr, ni fyddwn yn gallu parhau i gyrraedd y safonau dŵr yfed uchel y mae'n rhaid i ni gydymffurfio â nhw, a bydd cwsmeriaid mewn perygl o fwy o doriadau i’r cyflenwad dŵr yn y dyfodol.
Rydym wedi treulio amser yn ystyried yr opsiynau sydd ar gael i ni, gan ymgynghori hefyd â'r gymuned leol a rhanddeiliaid ar ein cynigion, er mwyn helpu i lywio ein penderfyniadau a chael yr ateb gorau i foderneiddio ein cyfleusterau trin dŵr.
Rydym yn ymgynghori ar ein cynigion erbyn hyn, a chredwn y byddant yn darparu'r ateb gorau i fuddsoddi yn ein cyfleusterau trin dŵr sy'n heneiddio a'u disodli er mwyn cyflawni ein dyletswydd gyfreithiol, gan leihau'r effeithiau amgylcheddol a'r costau i'n cwsmeriaid hefyd.
Croeso i’n hymgynghoriadau
30 Hydref – 10 Rhagfyr 2025
Rydym wedi lansio dau ymgynghoriad cyn gwneud cais statudol, wedi'u cynllunio i rannu gyda chi'r angen am y buddsoddiad a'n cynigion i fuddsoddi mewn gweithfeydd trin dŵr newydd a chydnerth a chyfleusterau cysylltiedig.
Mae ein cynnig yn cynnwys adeiladu gwaith trin dŵr newydd yn Fferm Dan-y-Castell ym Merthyr Tudful, yn agos at Ffordd Blaenau'r Cymoedd yr A465, ynghyd â gorsaf bwmpio dŵr crai newydd yn ein safle ym Mhontsticill, i ddisodli Gwaith Trin Dŵr presennol Pontsticill.
Tra bod ein cynnig arall yn cynnwys buddsoddi yng Ngwaith Trin Dŵr presennol Llwyn-onn a'i uwchraddio, a fydd yn caniatáu datgomisiynu Gwaith Trin Dŵr Cantref a adeiladwyd yn wreiddiol yn ôl ym 1926.
Rydym yn ymgynghori ar bob cynnig ar wahân a bydd angen i ni gyflwyno dau gais cynllunio ar wahân, un ar gyfer pob cynnig, i'r awdurdodau cynllunio perthnasol: Cyngor Bwrdeistref Sirol Merthyr Tudful a Pharc Cenedlaethol Bannau Brycheiniog.
Gyda'i gilydd, bydd y cynlluniau'n moderneiddio'r rhwydwaith dŵr yfed ledled De Cymru, gan ddisodli cyfleusterau trin sy’n ganmlwydd oed a chynyddu'r capasiti storio dŵr glân.
Rydym am glywed eich barn
Mae'r ymgynghoriadau hyn yn rhoi cyfle i'r gymuned leol, ein cwsmeriaid a'n rhanddeiliaid adolygu ein cynlluniau a dogfennau cais cynllunio drafft, ac i roi sylwadau cyn i ni wneud cais am ganiatâd cynllunio.
Bydd yr adborth a geir fel rhan o'r ymgynghoriadau hyn yn cael ei ystyried wrth i ni gwblhau ein cais. Bydd y sylwadau a godwyd, a sut y gwnaethom eu hystyried, yn rhan o’n cyflwyniad cais cynllunio terfynol - a nodir yn yr Adroddiadau Ymgynghori Cyn Gwneud Cais.
Cyn rhoi eich adborth i ni, cymerwch yr amser i edrych ar ein deunyddiau ymgynghori.
Rydym wedi creu dwy dudalen ar y wefan, un ar gyfer pob cynnig. Gallwch gael mynediad i'r tudalennau hyn drwy glicio ar yr adrannau isod.
Mae gan bob safle ystafell ymgynghori rithwir, sy'n cynnwys gwybodaeth am y cynnig perthnasol. Gwnewch yn siŵr eich bod yn darllen y wybodaeth ychwanegol ar y prif fwrdd yn yr ystafell ymgynghori rithwir, sy'n cynnwys dolen i'r map rhyngweithiol a'r ffurflen adborth ar-lein. Ceir hefyd ddwy sgrin ym mhob ystafell, sy'n cynnwys ffilm gyflwyniadol, delweddau a thaflen hedfan heibio a gynhyrchwyd gan gyfrifiadur i'ch helpu i ddeall sut olwg allai fod ar y datblygiadau.
Mae cyfres o ddogfennau cynllunio drafft ar gael ar bob safle i chi eu hadolygu.
Ceir manylion ar sut i anfon eich sylwadau atom ar wefannau ymgynghori isod. Mae ffurflenni ar wahân ar gyfer pob cynnig fel y gallwn sicrhau y bydd unrhyw sylwadau a geir yn benodol i bob cynnig. Rydym wedi defnyddio system codau lliw ar y ffurflenni er mwyn eglurder.
Rydym yn croesawu ac yn annog adborth ar y ddau gynnig. I'r rhai sydd am wneud sylwadau ar y ddau, bydd angen i chi lenwi'r ddwy ffurflen adborth.
Cwrdd â’r tîm
Dewch i un o'n digwyddiadau gwybodaeth ar gyfer y cyhoedd i siarad â'r tîm, gofyn cwestiynau a dysgu mwy am ein cynigion a pham mae angen i ni eu cyflawni.
Ein digwyddiadau ymgynghori:
- Dydd Iau 6 Tachwedd - 3pm-6pm yn Neuadd Goffa Pontsticill, Heol Faenor, CF48 2RU
- Dydd Iau 13 Tachwedd - 2pm-7pm yn Neuadd Gymunedol Cefn Coed, Stryd Newydd yr Eglwys, CF48 2NA
- Dydd Mercher 26 Tachwedd - 3pm-6pm yn Nant Ddu Lodge & Spa, CF48 2HY
- Dydd Iau 4 Rhagfyr - 1pm-5:30pm yn Llyfrgell Ganolog Merthyr Tudful, Stryd Fawr, CF47 8AF
Gwybodaeth bellach
Cwestiynau Cyffredin
Rydym yn deall y bydd llawer o gwestiynau am y prosiect hwn a pham mae angen i ni ei wneud. Os oes gennych unrhyw ymholiadau, anfonwch neges e-bost atom cwmtafproject@dwrcymru.com.
Byddwn yn diweddaru'r adran hon drwy gydol y cyfnod ymgynghori gan ymateb i'r cwestiynau cyffredin.
Ein hymgynghoriadau anstatudol blaenorol
Cynnig gwreiddiol: Gwaith Trin Dŵr ar Un Safle 2022
Yn 2022, cynhaliwyd ymgynghoriad anstatudol ar gynigion cynnar i ddisodli'r tri safle gwaith trin dŵr presennol gyda gwaith trin dŵr newydd ar un safle ar Fferm Gurnos, Merthyr Tudful, a gwahoddwyd y gymuned leol a rhanddeiliaid i wneud sylwadau ar y cynnig hwn.
Roedd yr adborth a gawsom yn hynod ddefnyddiol. Yn dilyn ymgynghoriad 2022, gwnaethom dreulio amser yn gwrando ar adborth y gymuned leol ac yn herio ein hunain i weld a oedd atebion eraill a oedd yn cydbwyso ein hangen i gyflawni ein dyletswydd gyfreithiol i wella'r seilwaith dŵr lleol gan ystyried adborth y gymuned ac effeithiau amgylcheddol hefyd.
Cynigion diwygiedig: Dull ar draws dau safle 2024
Yn 2024, cynhaliwyd ymgynghoriad anstatudol pellach ar y cynigion diwygiedig hyn, a fydd gyda'i gilydd yn darparu cyfleusterau trin dŵr newydd a chydnerth, gan ddiogelu a pharatoi'r cyflenwad dŵr at y dyfodol i genedlaethau'r presennol a'r dyfodol, gan ddileu'r angen am waith trin mwy o faint ar un safle ar Fferm Gurnos.
Drwy gymryd amser ychwanegol i adolygu a chynnal arolygon pellach, roeddem yn gallu diwygio ein cynigion gan gynnig dull ar draws dau safle, sy'n golygu cynnig uwchraddio Gwaith Trin Dŵr presennol Llwyn-onn ac adeiladu gwaith trin dŵr newydd llai o faint yn Fferm Dan-y-Castell, Merthyr Tudful, ynghyd â gorsaf bwmpio dŵr crai newydd yn ein safle Gwaith Trin Dŵr presennol ym Mhonsticill.
Mae’r dull ar draws dau safle yn ein galluogi i:
- Uwchraddio un o'r gweithfeydd trin dŵr presennol ac ailddefnyddio asedau presennol Dŵr Cymru.
- Lleihau maint gwaith trin dŵr newydd sydd ei angen yn ardal Merthyr Tudful.
- Lleihau faint o bibellau a gorsafoedd pwmpio newydd sydd eu hangen, gan ddiogelu treftadaeth ac amharu ar draffig cyn lleied â phosibl.
- Lleihau costau cyfalaf a'r gost i'n cwsmeriaid.
- Darparu ateb carbon ymgorfforedig is drwy fanteisio i’r eithaf ar y seilwaith presennol.
Ceir rhagor o wybodaeth am y cynigion hyn yn Nhaflen Ymgynghori Anstatudol Dŵr Cwm Taf 2024, sydd ar gael yn yr adran dogfennau blaenorol isod.
Hoffem ddiolch i bawb a roddodd o’u hamser i ymgysylltu â'r broses ymgynghori anstatudol. Mae'r adborth a gafwyd wedi'i werthfawrogi'n fawr.
Darllenwch ein hadroddiadau adborth anstatudol yma:
PDF: Adroddiad adborth anstatudol Dan-y-Castell
PDF: Adroddiad adborth anstatudol Llwyn-onn
Beth nesaf
Er mwyn i ni gyflawni ein dyletswydd gyfreithiol a symud ymlaen â'n cynigion i fuddsoddi yn ein cyfleusterau trin dŵr, bydd angen i ni geisio caniatâd cynllunio.
Yn dilyn yr ymgynghoriadau cyn gwneud cais, byddwn yn cwblhau ein dogfennau cynllunio cyn cyflwyno ceisiadau cynllunio ar wahân ar gyfer pob cynnig i'r ddau awdurdod cynllunio perthnasol, Cyngor Bwrdeistref Sirol Merthyr Tudful ac Awdurdod Parc Cenedlaethol Bannau Brycheiniog.
Bydd ymgynghoriadau cyn ymgeisio yn cau ddydd Mercher 10 Rhagfyr 2025.