Uwchraddio’r pibellau dŵr rhwng Llys-wen a Clifford
Rydyn ni’n buddsoddi £20 miliwn yn y rhwydwaith dŵr rhwng Llys-wen a Clifford. Bydd hyn yn ein helpu ni i barhau i ddarparu cyflenwad dibynadwy o ddŵr diogel a glân yn yr ardal am ddegawdau i ddod.
Pam ydyn ni’n gwneud hyn?
Mae rhai o’r pibellau sy’n helpu ein cwsmeriaid i fwynhau cawod a phaned o de bob bore dros 100 oed erbyn hyn. Dros amser, mae dyddodion naturiol yn gallu cronni yn y pibellau gan arafu llif y dŵr. Er nad yw’r dyddodion hyn yn niweidiol, mae angen i ni lanhau’r pibellau bob nawr ac yn y man er mwyn cadw’r dŵr yn llifo’n rhydd.
Rydyn ni’n buddsoddi £20 miliwn i helpu i sicrhau diogelwch cyflenwadau ein cwsmeriaid ac i liniaru’r problemau sy’n effeithio ar rai cwsmeriaid yn yr ardal o ran colli cyflenwadau neu bwysedd dŵr isel.
Beth mae’r gwaith yn ei olygu?
Gyda rhai rhannau o’r rhwydwaith yn dod at ddiwedd eu hoes weithredol, bydd y gwaith yn cynnwys adnewyddu tua 21km, a glanhau tua 3km o bibellau dŵr rhwng Llys-wen a Clifford. Yn ogystal â gwella ansawdd y dŵr yfed ar gyfer y cymunedau o dan sylw, bydd hyn yn helpu i sicrhau diogelwch cyflenwadau ac yn lliniaru problemau ar y rhwydwaith dŵr yn y dyfodol hefyd.
Byddwn ni’n defnyddio cyfuniad o ddulliau traddodiadol ac arloesol i gyflawni’r gwaith cyn gynted â phosibl, ac fe wnawn ein gorau glas i darfu cyn lleied â phosibl ar y gymuned.
Ni fydd y gwaith yn effeithio ar y rhan fwyaf o’r cwsmeriaid, ac mae’n debygol na fyddant yn sylwi bod y gwaith yn cael ei wneud hyd yn oed, ond byddwn ni’n ysgrifennu at unrhyw gwsmeriaid y gallai’r gwaith effeithio’n uniongyrchol arnynt i rannu’r holl wybodaeth angenrheidiol.
Ein contractwyr
Byddwn ni’n gweithio gyda Morrison Water Services a’u cadwyn gyflenwi i’n helpu ni i gyflawni’r gwaith. Byddan nhw’n gweithio dydd Llun i ddydd Gwener rhwng 7.30am a 5.30pm, ond bydd yna adegau pan fydd angen iddynt weithio’r tu hwnt i’r oriau hyn ac ar benwythnosau er mwyn cwblhau’r gwaith yn gyflym.
Ble fydd ein timau’n gweithio rhwng Ionawr a Mawrth 2024
O wythnos gyntaf Ionawr ymlaen, bydd ein tîm ar y safle’n paratoi safle’r gwaith ar Belmont Road. Wedyn byddan nhw’n dechrau gosod y brif bibell ddŵr newydd wrth gyffordd Carlasgate/Belmont Road ac yn parhau i weithio’u ffordd i lawr Belmont Road i gyfeiriad Newport Street.
Bydd y tîm yn gweithio gam wrth gam ar hyd y llwybr yma, a bydd y ffordd ar gau yn ystod y cyfnod hwn. Bydd gwyriad clir yn gweithredu gydag arwyddion priodol o gwmpas y Gelli Gandryll i ddangos y ffordd i bobl sy’n teithio i mewn i’r dref. Bydd y tîm yn gweithio ar hyd y llwybr yma hyd at y fan lle mae’r gwaith gosod wedi cyrraedd eisoes, cyn symud ymlaen i Newport Street ddiwedd Ionawr.
Gallwn eich sicrhau chi y bydd pob busnes ar agor fel arfer, a byddwn ni’n parhau i gydweithio’n agos â’r Siambr Fasnach a busnesau lleol er mwyn sicrhau ein bod ni’n tarfu cyn lleied â phosibl ar fusnes yn y dref.
Mae angen i ni wneud rhywfaint o waith ar Stryd Casnewydd, rhwng The Globe a chyffordd Lôn Nantglasdwr/Stryd Casnewydd. Roedd y gwaith hwn i fod i ddechrau tua diwedd mis Ionawr, fodd bynnag, oherwydd materion na ragwelwyd, mae ein tîm ar hyn o bryd yn cynnal trafodaethau i gadarnhau mân fanylion. Byddwn yn cysylltu â'r rhai yr effeithir arnynt ac yn diweddaru ein gwefan gyda mwy o wybodaeth yn nes at ddechrau'r gwaith.
Cwblhawyd rhan hanfodol o’r prosiect yn ardal Llys-wen ddiwedd Hydref. Ar hyn o bryd, rydyn ni’n disgwyl i’r gwaith ailgychwyn yng ngwanwyn 2024. Byddaf i’n ysgrifennu at drigolion pentref Llys-wen yn nes at amser y gwaith yna.
O wythnos gyntaf Ionawr, bydd tîm yn dechrau gwaith yn y briffordd y tu allan i Buckton House, Llanigon, ac yn gweithio’u ffordd i fyny at Willow Croft, Llanigon. Bydd y ffordd ar gau rhwng y ddau leoliad yma wrth i’r tîm osod y bibell ddŵr yn y ffordd. Bydd modd i drigolion fynd a dod, ond bydd llwybr gwyriad yn gweithredu i draffig sydd am ddefnyddio’r llwybr yma.
Byddwn ni’n gweithio ar y rhan yma o’r gwaith tan ddiwedd Mawrth. Ar ôl gosod y bibell, byddwn ni’n dechrau gweithio yn y cae gyferbyn â Willow Croft a byddwn ni’n darparu rhagor o fanylion yn hynny o beth yn nes at amser y gwaith.
Yn ystod wythnos gyntaf Ionawr, bydd tîm arall yn gweithio trwy’r hawl tramwy cyhoeddus sy’n arwain at gefn rhifau 1 a 2 Bron y Mynydd, yn y cae y tu ôl i Brecon Beacon Edges.
Bydd y lôn ar gau, ond bydd modd i drigolion fynd a dod o hyd. Dylid nodi na chaniateir unrhyw draffig trwodd yn ystod y cyfnod hwn, a bydd gwyriad yn gweithredu.
Bydd yr un tîm yn parhau i weithio ar hyd yr A438 ac yn y caeau preifat tan ddiwedd mis Mawrth. Efallai y sylwch fod mesurau rheoli traffig yn gweithredu yn yr ardal pan fydd y tîm yn gweithio wrth ymyl y lôn gerbydau.
Bydd gennym dîm arall yn gweithio ger Isbwerdy Gwernyfed o ddechrau Ionawr ymlaen. Bydd y ffordd ar gau am tua phythefnos, a bydd gwyriad yn gweithredu, ond bydd modd i drigolion fynd a dod. Ar ôl cwblhau’r gwaith, bydd y tîm yn symud ymlaen i gae cyfagos lle byddan nhw’n parhau â’r gwaith o osod y bibell ddŵr.
Efallai y sylwch arnom ni’n gweithio yn y caeau yn ardal Aberllynfi, o Wernyfed i gyfeiriad Llanigon. Byddwn ni’n parhau i osod y bibell ddŵr newydd sbon yn yr ardaloedd hyn, ond ni ddylai’r gwaith yma effeithio’n ormodol ar gwsmeriaid. Bydd y gwaith yma’n parhau, ac os ydyn ni’n debygol o darfu ar y cyhoedd ar led, byddwn ni’n anfon gohebiaeth bellach yn hynny o beth.
Eich cyflenwad dŵr yn ystod y gwaith
Ni ddylai’r rhan fwyaf o’r gwaith effeithio dim ar eich cyflenwad dŵr. Ond mae’n bosibl y bydd eich dŵr yn edrych ychydig bach yn fwy tywyll nag arfer ar adegau. Mae hyn yn eithaf normal wrth i ni gyflawni gwaith fel hyn, a dylai glirio wrth redeg y tap dŵr oer.
Os oes adegau pan fydd angen i ni ddatgysylltu eich cyflenwad dŵr am gyfnod byr, byddwn ni’n cysylltu â chi ymlaen llaw trwy anfon neges destun. Fel y gallwch dderbyn y negeseuon hyn, sicrhewch fod gennym rif ffôn poced neu ffôn cartref ar eich cyfer.
Gallwch ddilysu hyn a diweddaru eich manylion cyswllt trwy gysylltu â ni trwy Sgwrs Fyw (trwy’r botwm Angen Cymorth) ar ein gwefan, neu trwy ffonio ein rhif 24 awr ar 0800 052 0130.
Y cynllun rheoli traffig
Bydd yna adegau pan fydd angen i ni weithio yn y ffordd, a bryd hynny byddwn ni’n defnyddio cyfuniad o oleuadau dwy ffordd a phedair ffordd i gadw’r traffig yn llifo. Ond bydd yna adegau pan fydd angen i ni weithio yn union y tu allan i eiddo unigol, ac mae’n bosibl y bydd angen i ni ofyn i rai pobl beidio â pharcio yn ardal y gwaith. Os felly, byddwn ni’n sicr o roi gwybod i chi mewn da bryd. Gallwn eich sicrhau chi y byddwn ni’n cwblhau’r gwaith ar y ffordd cyn gynted ag y gallwn ni.
Wrth i’r gwaith fynd yn ei flaen, byddwn ni’n diweddaru adran Yn Eich Ardal ein gwefan a’n sianeli cyfryngau cymdeithasol gan rannu’r manylion diweddaraf fel eich bod chi’n gwybod beth i’w ddisgwyl.