Ein gwaith yn Danescourt
Rydyn ni’n cyflawni’r gwaith yma i hwyluso twf yng Nghaerdydd, gan gydweithio’n agos â’r awdurdod lleol a’r datblygwr i sicrhau bod gan rwydwaith dŵr gwastraff Caerdydd ddigon o gapasiti i barhau i wasanaethu’r gymuned ehangach wrth i’r datblygiad symud yn ei flaen. Rydyn ni wedi canfod bod digon o gapasiti gan y rhwydwaith dŵr gwastraff yn Ystum Taf i drosglwyddo rhywfaint o’r llif i mewn i’r rhwydwaith yna i’w gludo ymlaen wedyn i Weithfeydd Trin Dŵr Gwastraff Caerdydd lle caiff ei drin.
Rydyn ni wedi edrych ar amryw o atebion i wneud hyn. Lle bo modd a lle bo digon o gapasiti, bydd rhai o’r eiddo newydd yn cysylltu â’n carthffosydd cyfredol. Lle nad yw hyn yn bosibl, yr unig ateb hyfyw yw trosglwyddo llif y dŵr gwastraff i un o’n prif garthffosydd cyfredol er mwyn cludo’r llif i Weithfeydd Trin Dŵr Gwastraff Caerdydd.
Er mwyn cyflawni hyn, mae angen i ni groesi afon Taf a’r rheilffordd sy’n rhedeg rhwng Caerdydd a Radyr, ac rydyn ni’n cydweithio’n agos â Chyfoeth Naturiol Cymru a Thrafnidiaeth Cymru yn hyn o beth. Yr ardal y tu ôl i De Braose Close yw’r lleoliad mwyaf addas ac ymarferol i wneud hyn gan ddefnyddio’r technegau peirianneg sifil sy’n angenrheidiol. Dechreuodd y gwaith ym mis Medi 2023.
Ein hardal waith
Cyflawnir ein gwaith y tu ôl i Glos De Braose wrth ymyl afon Taf a’r rheilffordd. Bydd gennym safle gwaith dros dro yn ystod y cyfnod hwn, a dangosir hyn ar y map isod.
Sefydlwyd ein safle ym mis Hydref 2023 a dechreuodd y gwaith yn Danescourt ym mis Tachwedd 2023. Yn anffodus, mae amgylchiadau na allem fod wedi eu rhagweld wedi achosi oedi gyda datblygiad y gwaith. Daeth dŵr i mewn i waelod y siafft ym Mharc Hailey gan achosi llifogydd sylweddol a difrod i’r peiriant twnelu (TBM).
Yn dilyn ymchwiliad manwl gyda’n contractwr twnelu, cadarnhawyd na ellir trwsio’r difrod i’r TBM yn ei leoliad presennol. Am hynny, bydd angen tynnu’r peiriant o’r twnnel a’r siafft a’i atgyweirio oddi ar y safle.
Ar hyn o bryd, rydyn ni’n disgwyl i’r gwaith ailgychwyn ym mis Ionawr 2026, a byddwn ni’n rhannu amserlen newydd pan fydd y gwaith wedi dechrau.
Traffig y gwaith
Bydd traffig gwaith yn mynd a dod i’r safle’n gyson. Bydd faint o draffig sy’n mynd a dod yn amrywio yn dibynnu ar y gweithgareddau adeiladu ar y pryd, ond fe wnawn ein gorau i darfu cyn lleied â phosibl ar y gymuned lle bynnag y bo modd. Bydd yr holl draffig gwaith yn defnyddio Danescourt Way, Timothy Rees Close a De Braose Close.
Y Trac Mynediad
Rydyn ni wedi cyflawni ychydig o waith ymchwilio yn yr ardal hon eisoes i edrych ar amodau’r tir a chadarnhau a fyddai’n addas i ni gyflawni ein gwaith yma ai peidio. I wneud hyn yn ddiogel, rydyn ni wedi adeiladu trac cerrig o ben Clos De Braose i’r ardal waith. Cymerodd y trac dair wythnos i’w adeiladu, felly er mwyn tarfu cyn lleied â phosibl ar y trigolion a’r amgylchedd lleol, rydyn ni wedi gadael y trac yma yn ei le yn barod ar gyfer ein gwaith.
Roeddem ni wedi bwriadu gwneud y trac mynediad yn un parhaol. Ond ar ôl ymgynghori â’r gymuned leol, rydyn ni wedi penderfynu dileu’r trac a byddwn ni’n adfer yr ardal i’w gyflwr gwreiddiol ar ôl i ni gwblhau ein gwaith. Fodd bynnag, os oes angen i’n tîm gweithredol gyflawni gwaith cynnal a chadw neu gyrchu ein hasedau os bydd digwyddiad, byddwn ni’n dilyn y gweithdrefnau angenrheidiol yn unol â Deddf y Diwydiant Dŵr 1991.
Cynnwys cyffredinol