Ymestyn yr Hysbysiad Berwi Dŵr - Llythyr agored oddi wrth Peter Perry

Pwrpas y llythyr hwn yw cadarnhau bod angen i ni ymestyn yr ‘hysbysiad berwi dŵr’ am hyd at wythnos.

Dechreuodd yr hysbysiad gwreiddiol ar ddydd Sul 24ain Tachwedd ac felly rydym yn gofyn i gwsmeriaid barhau i ferwi eu dŵr yfed am 7 diwrnod arall (tan ddydd Sul, 8fed Rhagfyr).

Pam mae angen i ni wneud hyn?

Gwnaeth y mesurydd tywydd yn Nhynywaun fesur yr ail lawiad uchaf yn y DU ddydd Sadwrn a dydd Sul diwethaf.

Arweiniodd hyn at lawer iawn o lifogydd ar y safle a dŵr wyneb yn rhedeg o’r bryn i’r tanc storio dŵr yfed gan effeithio ar y tanc. Dyma pam y gwnaethom gyhoeddi hysbysiad berwi dŵr rhagofalus ar unwaith wrth i ni weithio i ddiogelu’r tanc.

Rydym yn wynebu nifer o heriau wrth i ni geisio cwblhau hyn er gwaethaf gweithio bob awr o’r dydd a’r nos.

Yn gyntaf oll, mae peth o’r gwaith i atal difrod rhag llifogydd yn y dyfodol yn cynnwys gosod pilenni dal dŵr o amgylch y tanc storio. Er mwyn gwneud hyn yn llwyddiannus, mae angen cyfnod o dywydd sych. Mae’r glaw ysbeidiol yr wythnos hon, fel y byddwch wedi ei brofi’n lleol, wedi arafu ein hymdrechion i wneud hyn ac mae perygl o law ysbeidiol dros y dyddiau nesaf. Mae angen i ni hefyd osod y pilenni hyn ar do’r tanciau, ac i wneud hyn yn ddiogel, rydym yn gyfyngedig o ran pwysau peiriannau y gallwn eu defnyddio wrth i ni weithio i gyflawni hyn. Mae hyn i gyd wrth sicrhau diogelwch ein tîm ar y safle hefyd yn golygu bod angen i ni gymryd rhagor o amser i weithio’n ofalus ar gyfer y rhan hon o’r gwaith hanfodol.

Iawndal

I gydnabod yr anghyfleustra estynedig hwn, bydd taliad pellach o £100 yn cael ei wneud i bob aelwyd yr effeithir arnynt. Mae hyn ar ben y taliad gwreiddiol o £150 a roddwyd i gwsmeriaid. Ar gyfer busnesau, byddwn yn gwneud taliad ychwanegol o £200. Mae hyn yn ychwanegol at y taliad o £300 a roddwyd i fusnesau ynghyd â’n cynllun ar gyfer cyfrannu tuag at rai costau/colli elw gros.

Mae tair gorsaf poteli dŵr ar agor i breswylwyr gasglu dŵr potel, ac mae tua 150,000 o boteli wedi’u dosbarthu hyd yma i gwsmeriaid bregus, aelwydydd, ysgolion a meithrinfeydd. Os ydych chi’n gwybod am unrhyw gwsmeriaid bregus nad ydynt wedi cofrestru eto ar ein Cofrestr Gwasanaethau Blaenoriaeth, anogwch nhw i gysylltu â ni a chofrestru er mwyn i ni allu trefnu danfon dŵr atynt. Os oes gennych ymholiadau neu os oes angen i chi gofrestru ar gyfer ein Cofrestr Gwasanaethau Blaenoriaeth, ffoniwch ein tîm gwasanaeth cwsmeriaid ar 0800 052 0130 – mae’r llinellau ar agor 24 awr y dydd 7 diwrnod yr wythnos.

Hoffwn ymddiheuro eto am yr anghyfleustra a diolch i chi am weithio gyda ni wrth i ni geisio sicrhau bod popeth yn ôl i’r drefn arferol cyn gynted â phosibl.

Yn gywir,

P. Perry
Prif Weithredwr,
Dŵr Cymru