Mae system dŵr gwastraff Trefesgob yn mynd i gael hwb, diolch i brosiect uwchraddio gwerth £500,000 gan Dŵr Cymru.
- Buddsoddiad o £500,000 i uwchraddio’r system dŵr gwastraff yn Nhrefesgob, Casnewydd.
- Bydd y gwaith yn gwneud i’r system weithio’n well ac yn lleihau perygl llifogydd i dai a busnesau yn yr ardal.
- Bydd y gwaith yn dechrau ddydd Llun 5 Gorffennaf.
Mae’r cwmni nid-er-elw bob amser yn ymdrechu i sicrhau bod ei gwsmeriaid yn cael gwasanaeth o’r safon uchaf. Bydd gwaith y cwmni’n cynnwys glanhau ac ail-leinio rhannau o’r bibell garthffosiaeth sy’n rhedeg trwy Drefesgob. Bydd hyn yn golygu bod y rhwydwaith yn gweithio’n well yn ystod glaw trwm a bydd yn lleihau perygl llifogydd.
Gwneir y gwaith fesul cam, gyda’r cam cyntaf yn dechrau ddydd Llun 5 Gorffennaf. Bydd y cam hwn yn cynnwys glanhau darnau o bibell y garthffos a bydd yn cymryd tua mis i’w gwblhau.
Bydd yr ail gam yn dechrau yn ystod wythnos gyntaf mis Medi a bydd yn golygu ail-leinio darnau o bibell y garthffos. Disgwylir i’r cam hwn gymryd tua mis i’w gwblhau hefyd.
Byddwn yn cau rhan fechan o’r briffordd sy’n rhedeg trwy Drefesgob yn ystod cam cyntaf ac ail gam y gwaith. Bydd y cwmni’n trefnu bod y trigolion yn cael mynd a dod yn ystod y cyfnod hwn a chodir arwyddion clir i nodi ffordd arall i fynd.
Dywedodd Rheolwr Prosiectau Dŵr Cymru, Sonny Wall: “Rydym ni fel cwmni wedi ymrwymo i sicrhau ein bod yn darparu system dŵr gwastraff effeithiol sy’n rhoi gwasanaeth o’r safon uchaf i’n cwsmeriaid ac sy’n gwarchod ein hamgylchedd gwerthfawr. Mae ein gwaith yn Nhrefesgob yn adlewyrchu ein hymrwymiad i ailfuddsoddi ein helw er budd y cwsmeriaid a’r amgylchedd.
“Rydym am sicrhau bob amser bod ein cwsmeriaid yn gwybod beth rydym yn ei wneud pan fyddwn yn gweithio yn eu cymuned. Felly rydym wedi ysgrifennu at y trigolion i sôn wrthynt am y gwaith ac rydym wedi rhoi’r wybodaeth ddiweddaraf yn yr adran Yn Eich Ardal ar ein gwefan.
“Rydym yn sylweddoli y gall y math hwn o waith achosi anhwylustod i’n cwsmeriaid ambell waith ond fe wnawn ein gorau i greu cyn lleied o drafferth ag y gallwn a hoffem ddiolch i bobl am fod yn amyneddgar tra byddwn yn gwneud y gwaith hanfodol hwn.”